Turqia nuk ia ka mbyllur derën Suedisë dhe Finlandës për t’u anëtarësuar në NATO, por dëshiron negociata me vendet nordike dhe një shtypje të atyre që i sheh si aktivitete terroriste veçanërisht në Stokholm, ka thënë një zëdhënës i presidentit Tayyip Erdogan të shtunën.
Ibrahim Kalin, i cili është gjithashtu këshilltari kryesor i presidentit për politikën e jashtme, i ka thënë Reutersit se Turqia do që të jetë e sigurt.
“Nuk po e mbyllim derën. Por thjesht po e ngremë këtë çështje si çështje të sigurisë kombëtare për Turqinë”, tha ai.
Erdogani i befasoi anëtarët e NATO-s dhe dy vendet nordike që kërkojnë anëtarësimin duke thënë të premten se nuk ishte e mundur që Turqia të mbështeste zgjerimin e aleancës, sepse Finlanda dhe Suedia ishin “shtëpia e shumë organizatave terroriste”.
Çdo shtet që kërkon të anëtarësohet në NATO ka nevojë për mbështetjen unanime të anëtarëve të aleancës ushtarake. Shtetet e Bashkuara dhe vendet e tjera anëtare janë përpjekur të sqarojnë pozicionin e Ankarasë.
Stokholmi pritet të ndjekë shembullin e Helsinkit dhe mund të aplikojë për hyrje në aleancën ushtarake prej 30 vendesh që nga e hëna.
Por, Kalin ka thënë se Partia militante e Punëtorëve të Kurdistanit (PKK) – e cilësuar si organizatë terroriste nga Turqia, Shtetet e Bashkuara dhe Bashkimi Evropian – po mblidhte fonde dhe rekrutonte në Evropë dhe prania e saj është “e fortë, e hapur dhe e njohur” në Suedi në veçanti.
“Ajo që duhet bërë është e qartë: ata duhet të ndalojnë së lejuari qendrat, aktivitetet, organizimet, individët dhe llojet e tjera të pranisë së PKK-së në ato vende. Anëtarësimi në NATO është gjithmonë një proces. Do të shohim se si do të shkojnë gjërat. Por kjo është pika e parë që ne duam të sjellim në vëmendjen e të gjithë aleatëve si dhe autoriteteve suedeze”, tha Kalin.
